كان فى انسان عنده شوية خرفان ,
يجى كل يوم يحطلهم الاكل ويعقد شويه معاهم وبعد كدا يقفل الباب عليهم ويمشى .
وكان فى ثعلب كان عارف ان فى المكان دا خرفان وعايز يدخل جوه المكان اللى فى الخرفان
علشان يخطف خروف ياكله , بص لقى الباب مقفول فكر الثعلب وشاف فأر
, فقاله احناعايزين نبقى اصحاب وانا عايز منك مساعده وخدمه ,
الفأر قاله عايز منى ايه . فرد التعلب قاله انا عايز ادخل جوةالاوضه دى اخطف خروف
ناكله انا وانت بس مش عارف علشان الباب مقفول
, فأنا عايزك تقرض فى الخشب بتاع الباب من تحت وتحفر فى الارض
علشان اعرف ادخل من تحت عقب الباب
وفعلا فضل الفأر يعمل كده لغاية ما فتح فتحه يدخل منها الثعلب ومسك خروف اكله
وقطعه وطلعه من تحت عقب الباب حته حته واكل هو والفأر .
وفضل على الحال دا هو والفار وصاحب الخرفان مش حاسس يجى كل يوم يبص
يلاقى الباب مقفول ميخدش باله ان الخرفان ناقصه
لغاية ما جه فى يوم وكان فى خروف صغير قال
احنا ليه نستنى الثعلب لما يدخل علينا وياكلنا واحد ورا التانى
انا اهرب واروح للثعلب واموته وهو نايم ونخلص منه .
وفعلا هرب الخروف الصغير وراح مكان الثعلب ولقى الثعلب نايم فقال هى دى فرصتى اموت الثعلب
واخلص من شره . وفجأه حس الثعلب وصحى من النوم ,
اتخض الخروف لكن الثعلب لقيه خروف صغير كدا وشكله حلو .
فقاله متخافش انا مش هاموتك انت عجبتنى وانا عايز نكون اصحاب .
فرح الخروف بكلام الثعلب وراح لباقى الخرفان قالهم انا خلصتكم من شر الثعلب خلاص
وبقينا اصحاب وهو النهارده جاى يتعرف علينا ومش هياكلنا ده بقى حبيبى خالص
. فرحوا باقى الخرفان وفضلوا مستنين الثعلب علشان يتعرفوا عليه ويبقوا اصحاب
كان الثعلب راح لباقى الثعالب اللى يعرفهم وقالهم تعالوا انا النهارده عازمكم
على وليمه كبيره وفعلا راح الثعلب هو باقى الثعالب لمكان الخرفان ,
لقى الفأر قاعد مستنيه فقالوا الثعلب لاء انا مش محتاجلك تانى وراح موته
بعد كدا قعد الثعلب يخبط على الباب فرد خروف مين فقالوا الثعلب
انا الثعلب صاحبكم جاى علشان اتعرف عليكم انا وباقى الثعالب علشان اعرفكم ومحدش مننا يخوفكم تانى
راح الخروف الصغير فرح وقال انا مش قلتلكم بقينا اصحاب
, وفتح الباب للثعالب ودخلوا وفضلوا يلاعبوا مع بعض وفى وسط ما هما فرحانين
ومهيصين جه ثعلب من الثعالب وراح قفل الباب مره واحده وهجموا على الخرفان كلهم
عاجت الخرفان وخافت لكن ما خلاص فات الوقت . فضل الخروف الصغير مفزوع
لغاية ما مات كل الخرفان واكلوهم الثعالب فقال الخروف للثعلب انت عملت ليه كدا
احنا مش بقينا اصحاب ؟ فرد الثعلب قالوا وهو ممكن يكون الثعلب صديق وحبيب للخروف ؟؟؟
وهجم الثعلب على الخروف الصغير ومات
حد فهم مغزى قصتى دى ؟؟؟
بصوا يا جماعه .. صاحب الخرفان دا كل اب وكل ام وكل راعى وكل خادم ,
شايف قدامه اولاده لكن ميعرفش عنهم اى حاجه ,
اخر اليوم بيلاقيهم نايمين فى اوضهم لكن ميعرفوش طول اليوم كانوا
فين بيجوا الاجتماعات فى الكنيسه بيحضروا مدارس الاحد لكن ميعرفوش
برا الكنيسه هما ايه او بيروحوا فين وبيصاحبوا مين من الناس .
شايفينهم قدامهم كويسين لكن مش حاسين بأى حاجه جواهم
اما الفار دا كل انسان يشبه يهوذا بيخون اخوه او اخته
او صديقه علشان المال او المركز او اى وعد بيحصل عليه
الخروف الناصح دا كل شاب وكل بنت بيحسوا انهم ممكن يجذبوا ناس للمسيح
من غير ما هما يكونوا متسلحين بالمسيح كويس بدل ما يغيروا ناس بيسقطوا هما نفسهم .
الخروف الناصح دا كل حد فينا بيندمج مع العالم فى حياته ويقول انه مش هيتأثر .
كل واحد مننا يمشى مع العالم فى حياته ويقول انه مستحيل يتخلى
عن مسيحه اذا كان هو فى معاشرته للعالم اتخلى عن النعمه يبقى ازاى النعمه هتفضل معاه
التعلب دا طبعا عدو الخير اللى بيكون فى شكل اى انسان بيبعدنا عن ربنا
اللى قال عنهم المسيح الثعالب اللى فى ذى حملان
